Baydhabo,(insidesomalia.org)- Magaalada Baydhabo ee Xarunta u ah Gobolka Bay ayaa habeenkii xalay ahaa waxaa lagu dilay nin ka tirsanaa Golaha Aqoonyahanada iyo siyaasadda Beelaha Digil iyo Mirifle.

Ninkani la dilay oo lagu magacaabi jiray Shiikh Ibraahim Yalaale ayaa waxaa toogtay kooxo bastoolado ku hubeysnaa, kuwaasi oo ku toogtay nawaaxiga Suuqa digaaga ee Magaalada Baydhabo.

Lama oga ilaa iyo haatan sababta ka dambeysay toogashada ninkaas oo aan dhana ka tirsaneyn dhinacyada isku haya Siyaasada Soomaaliya, marka laga reebo in uu ka tirsanaa Golaha aqoonyahannada Beelaha Digil iyo Mirifle.

Marxuumka xalay la dilay ayaa wuxuu ka tirsanaan jirey Xildhibaannadii Dowladdii Carta ee lagu soo dhisay Wadanka Jibuti Sanadka markuu ahaa 2000, wuxuuna wixii xiligaas ka dambeeyay ahaa siyaasi qunyar socod ah oo aan dhinacna raacsaneyn dhinacyada isku haya siyaasadda Dalka Soomaaliya.

Dhankal kalena, wararka naga soo gaaraya Magaalada Baydhabo ayaa waxay sheegayaan in Ciidamo Itoobiyaan ah oo aad u hubeysan ay saaka gudaha Magaaladaasi ku sugan yihiin, isla markaana ay baaris ka sameynayaan Xaafadaha ku dhow dhow Afar Irdoodka iyo nawaaxiga Bangiga, iyadoo markii ciidamada la arkay ay gebi ahaanba ay dadka guryahooda iska galeen,waxeyna xireen dadka kadhawaa aagaasi barista kasoconeysa Ganacsigoodii.